ಪ್ರವಾದಿ ಮುಹಮ್ಮದ್ [ಸ] ಮತ್ತು ಖದೀಜಾ [ರ]ರವರ ವಿವಾಹ

ಪ್ರವಾದಿ [ಸ]ಯವರ ಸದ್ಗುಣಗಳನ್ನು ಅರಿತಿದ್ದ ಕುರೈಶ್ ಗೋತ್ರದ ಖುವೈಲಿದ್ ರ ಪುತ್ರಿ ಖದೀಜಾ [ರ]ರವರು, ಪ್ರವಾದಿ [ಸ]ರವರನ್ನು ತಮ್ಮ ವ್ಯಾಪಾರದ ಸರಕುಗಳೊಂದಿಗೆ ಸಿರಿಯಾಕ್ಕೆ ಹೋಗುವಂತೆ ವಿನಂತಿಸಿದರು. ಪ್ರವಾದಿ[ಸ]ಯವರು ಖದೀಜಾರವರ ಆಹ್ವಾನವನ್ನು ಸ್ವೀಕರಿಸಿ ವ್ಯಾಪಾರದಲ್ಲಿ ಭಾರೀ ಲಾಭ ಸಂಪಾದಿಸಿದರು. ಖದೀಜಾರಿಗೆ ತುಂಬಾ ಸಂತೋಷವಾಯಿತು. ಮಾತ್ರವಲ್ಲದೆ, ಪ್ರವಾದಿ [ಸ]ಯವರ ಗುಣಸ್ವಭಾವಗಳು ಕೂಡಾ ಖತೀಜಾ [ರ]ರನ್ನು ಆಕರ್ಷಿಸಿತು. ವ್ಯಾಪಾರದ ಪ್ರಯಾಣದಲ್ಲಿ ಪ್ರವಾದಿಯವರ ಜತೆಯಲ್ಲಿದ್ದ ಜದೀಜಾ [ರ]ರವರ ಸೇವಕ ಮೈಸರತ್ ಪ್ರಯಾಣದ ಪ್ರತಿಯೊಂದು ಘಟನೆಯನ್ನು ಖದೀಜಾ [ರ]ರವರಿಗೆ ವಿವರಿಸಿದರು. ಬುದ್ಧಿವಂತೆಯಾದ ಖದೀಜಾ [ರ] ಮುಹಮ್ಮದ್ [ಸ]ರಲ್ಲಿ ಒಂದು ಮಹಾ ವ್ಯಕ್ತಿತ್ವವಿದೆಯೆಂದು ಗುರುತಿಸಿದರು. ಆದರಿಂದ ಅವರನ್ನು ವಿವಾಹವಾಗಲು ಅಪೇಕ್ಷಿಸಿದರು. ತಮ್ಮ ಈ ಅಪೇಕ್ಷೆಯನ್ನು ಅವರು ಪ್ರವಾದಿ [ಸ]ಯವರ ಚಿಕ್ಕಪ್ಪಂದಿರಿಗೆ ತಿಳಿಸಿದರು. ಅವರಿಗೂ ಸಂತೋಷವಾಯಿತು. ಹಾಗೆ ಪ್ರವಾದಿ [ಸ]ಯವರ 25ನೇ ವರ್ಷ ಪ್ರಾಯದಲ್ಲಿ ಖದೀಜಾರೊಂದಿಗೆ ವಿವಾಹ ನಡೆಯಿತು. ಅಂದು ಖದೀಜಾ [ರ]ರಿಗೆ 40 ವರ್ಷ ಪ್ರಾಯವಾಗಿತ್ತು.